Դավիթ Հակոբյանը ընտրվել է ԱՀ  Ընդհանուր իրավասության առաջին ատյանի դատավոր

ԱՀ Ազգային ժողովում Բարձրագույն դատական խորհրդի նախագահ Գայանե Գրիգորյանը ընդհանուր իրավասության առաջին ատյանի դատարանի դատավորի պաշտոնում Ազգային ժողովին է առաջարկել Արտակարգ իրավիճակների պետական ծառայության տնօրենի աշխատակազմի ղեկավար Դավիթ Հակոբյանի թեկնածությունը:

Գաղտնի քվեարկության արդյունքում հաշվիչ հանձնախմբի նախագահ Ռամելա Դադայանը հայտարարել է, որ Դավիթ Հակոբյանի օգտին քվեարկել է 18 պատգամավոր, դեմ` 12:

Նույն օրը Արցախի Հանրապետության  Գերագույն դատարանի նախագահ Նարինե Նարիմանյանն   ԱՀ  Ընդհանուր իրավասության առաջին ատյանի դատավորներին է ներկայացրել նորընտիր դատավոր  Դավիթ Հակոբյանին:

Ներկաների անունից  շնորհավորելով Դավիթ Հակոբյանին դատավորի պաշտոնում ընտրվելու կապակցությամբ, Նարինե Նարիմանյանը նշել է՝  դատավորի աշխատանքը որքան բարդ ու պատասխանատու, այնքան էլ պատվաբեր առաքելություն է:

« Դատավորի աշխատանքից ավելի պատվաբեր  աշխատանք չկա,  մնում է միայն առաջնորդվել օրենքով, խղճով եւ  արդարադատությունն   իրականացնել ամենայն  պատասխանատվությամբ»,- ասել է Ն. Նարիմանյանը:

Գերագույն դատարանի նախագահը նաեւ հույս է հայտնել, որ   Դ. Հակոբյանը  իր նախկին աշխատանքային փորձն էլ կներդնի (2009թ. ԱրՊՀ  դասախոս)   տեսական գիտելիքները  համատեղելով  պրակտիկ գործունեության հետ:

Դավիթ Հակոբյանն իր հերթին  նշել է, որ    դատավոր դառնալու որոշումը կայացրել է պարտքի եւ պատասխանատվության խորը գիտակցումով:

« Պատրաստ եմ իմ գործունեության ընթացքում առաջնորդվել օրենքին համապատասխան  եւ դատավորի երդմանը հավատարիմ:  Հավաստիացնում եմ Ձեզ՝ իմ  արարքներում տեղ չեն գտնելու  երեւույթներ, որոնք կվնասեն դատական իշխանության հեղինակությանը»,- նշել է Դավիթ Հակոբյանը:

Դավիթ Հակոբյանին շնորհավորել են նաեւ  Բարձրագույն  դատական խորհրդի նախագահ Գայանե Գրիգորյանը եւ  ԱՀ Ընդհանուր իրավասաության առաջին ատյանի նախագահ Անատոլի Թադեւոսյանը, մաղթելով  արդարացի եւ արդյունավետ աշխատանք: