ԱՀ նախագահ Բակո Սահակյանը շնորհավորական ուղերձ է հղել Դատական համակարգի աշխատողի օրվա կապակցությամբ

Դատական համակարգի հարգելի՛ աշխատակիցներ եւ վետերաններ,

Արցախի Հանրապետության իշխանությունների եւ անձամբ իմ անունից ի սրտե շնորհավորում եմ  ձեզ  Դատական համակարգի աշխատողի օրվա կապակցությամբ:

Սա եւս մեկ առիթ է  արժեւորելու եւ կարեւորելու ձեր առանցքային  դերակատարությունը  օրինականության, իրավունքի գերակայության եւ  մարդու իրավունքների  պաշտպանության, մեր երկրում ժողովրդավարական ինստիտուտների  զարգացման եւ պետականաշինության գործում :

Տարիներ շարունակ իրականացված բարեփոխումների եւ սկզբունքային քաղաքականության  նպատակն էր ունենալ անկախ եւ արհեստավարժ դատական իշխանություն, որի զարգացումն ու կատարելագործումը , դատական մարմինների եւ դատավորի  լիարժեք անկախության ու ինքնուրույնության ապահովմանն ուղղված  աշխատանքներն այսուհետ  եւս պետք է լինեն  հետեւողական ու կրեն շարունակական բնույթ:

Դատական համակարգի եւ գործող դատավորների  առաջնահերթ խնդիրներից եղել եւ  մնում է օրենքի տառին եւ ոգուն, արդարադատության սկզբունքներին խստագույնս հետեւելն ու դրանցով առաջնորդվելը:  Համոզված եմ, որ դա մշտապես կլինի  ձեր գործունեության հիմքում  եւ կօգնի արդյունավետորեն  իրականացնել ձեր գործառույթները:

Պետությունը կշարունակի  անհրաժեշտ միջոցներ  ձեռնարկել դատական  համակարգի աշխատողների աշխատանքային եւ սոցիալ-կենցաղային  խնդիրների լուծման ուղղությամբ:

Թանկագ՛ին բարեկամներ,

մեկ անգամ եւս շնորհավորում եմ ձեզ  մասնագիտական  տոնի առթիվ եւ մաղթում բոլորիդ հաջողություններ աշխատանքում եւ ընտանիքում: