Կայացավ Անահիտ Մանասյանի գրքի արցախյան շնորհանդեսը

Այսօր՝ մայիսի 10-ին Արցախի պետական համալսարանում կայացավ   ՀՀ Արդարադատության ակադեմիայի պրոռեկտոր, ԵՊՀ սահմանադրական իրավունքի ամբիոնի դոցենտ, իրավական գիտությունների թեկնածու Անահիտ Մանասյանի  «Սահմանադրական կայունությունը` որպես կայուն ժողովրդավարության կարեւորագույն գրավական» գրքի շնորհանդես-քննարկումը:

Արցախի  պետհամալսարանի ռեկտոր Արմեն Սարգսյանի  եւ  Դատավորների միության նախագահ Հասմիկ Խաչատրյանի հրավերով Արցախում գտնվող  Անահիտ Մինասյանը    հանդես է եկել նաեւ դասախոսությամբ:

Գրքի շնորհանդեսին ներկա էին ԱՀ գերագույն դատարանի նախագահ Նարինե Նարիմանյանը, ԱՀ ԲԴԽ  նախագահ  Գայանե Գրիգորյանը,  դատավորներ, դասախոսներ եւ ուսանողներ:

Մենագրության հեղինակ Անահիտ Մանասյանը նշել է, որ գրքի շնորհանդեսը ՀՀ-ում կազմակերպելուց   զատ անհրաժեշտություն էր այն նաեւ Արցախում ներկայացնելը, քանի որ Արցախի հետ կապված է  ջերմ  հուշերով, եւ արցախյան միջավայրում առանձնահատուկ ջերմություն կա:

Շնորհավորելով հեղինակին գրքի շնորհանդեսի առթիվ ԱՀ գերագույն դատարանի նախագահ Նարինե Նարիմանյանը նշեց, որ Անահիտ Մինասյանը նոր անուն չէ գիտական ոլորտում եւ հաճախակի է հանդես գալիս  «ԼՂՀ Դատական իշխանություն պարբերականում»:

«Բավականին ժամանակատար եւ քրտնաջան աշխատանք է տարել Անահիտ Մինասյանը, համարձակ եզրահանգումներ է արել, ինչը, կարծում եմ, կարելի է հաշվի առնել ՀՀ եւ ԱՀ օրենսդրական ակտերում փոփոխություններ կատարելու ժամանակ»:

ԱՀ դատավորների միության նախագահ  Հասմիկ Խաչատրյանը կարեւորելով  Ա. Մանասյանի  մենագրության շնորհանդես-քննարկման անցկացումը  Արցախի պետհամալսարանում,  նշեց, որ համալսարանը լինելով  Արցախի գիտական կաճառը՝ յուրահատուկ հարթակ է դարձել գիտական աշխատությունների յուրօրինակ  քննարկման համար:

«Մենագրության կարեւոր  արժեքներից է   իշխանությունների բաժանման  համատեքստում դատական իշխանության հաշվետվողականության եւ դատական իշխանության ու անկախության  հավասարակշռման  հայեցակարգը»,- նշել է նա:

 ԱՀ բարձրագույն դատական խորհրդի նախագահ Գայանե Գրիգորյանի հավաստմամբ՝ աշխատությունը գրված է պարզ լեզվով՝ հասկանալի նաեւ ոչ մասնագետներին:

«Կարեւոր է, որ սահմանադրությունը ներկայացված է ոչ թե զուտ որպես օրինական թուղթ, այլ որպես արժեհամակարգ»,- ընդգծել է Գայանե Գրիգորյանը:

Ներկաները շնորհավորել են Անահիտ Մինասյանին,  հույս հայտնելով, որ հետագայում նոր աշխատություններ լույս կտեսնեն: